Archive ref no: NCA-20274
प्रेस विज्ञप्ति
०६३ भदौ २७ गते
प्रेस विज्ञप्ति
नेकपा माओवादीद्वारा १५ महिना अघि अपहरण गरिएकी महाभारा गाविस-७ झापाकी २५ वर्षीय अम्बिकादेवी राजवंशीलाई हिजो भदौ २६ गते मुक्त गरिएको घटनाको हामी हार्दिक स्वागत गर्दछौं। माओवादीहरुद्वारा अपहरण गरी हालसम्म कब्जामा रहेका सम्पूर्णलाई अविलम्व मुक्त गर्न हामी नेकपा माओवादीसँग जोडदार माग गर्दछौं।
लोकतन्त्र स्थापना भएपछि माओवादी र सरकारबीच भएको युद्धविराम आचार संहिता विपरित माओवादीहरुले अपहरण कार्यलाई तीब्र बनाएका छन्। चार महिनाको अवधिमा ५ सय ९९ भन्दा बढी मानिसहरुलाई माओवादीद्वारा अपहरण गरिएको विवरण इन्सेकमा प्राप्त भएको छ।
यस्ता घटनाको प्रवृतिलाई हेर्दा माओवादीले ग्रामीण तहमा रहेका जनताको मौलिक अधिकारको रक्षा गर्ने पटक पटकको प्रतिबद्धतालाई पूर्णत लत्याएको आभास हुन थालेको छ। अतः माओवादीद्वारा भएका मानवअधिकार उल्लंघनका घटनाहरुलाई पूर्णत रोकी घोषित प्रतिबद्धतालाई पूर्णरुपमा पालना गर्न हामी जोडदार माग गर्दछौं।
सुबोधराज प्याकुरेल
अध्यक्ष